Davlat mulki qo’mitasi davlat boshqaruv organi hisoblanib, faoliyatining asosiy yo’nalishi iqtisodiy islohotlarni yanada chuqurlashtirish, davlat tasarrufidan chiqarish va xususiylashtirish jarayonlarini jadallashtirishdan iboratdir.

Davlat mulki qo’mitasi o’z faoliyati bo’yicha O’zbekiston Respublikasi Vazirlar Mahkamasiga hisobot beradi.

Davlat mulki qo’mitasi o’z faoliyatini O’zbekiston Respublikasi Konstitutsiyasi va Qonunlariga, Oliy Majlis qarorlariga, O’zbekiston Respublikasi Prezidentining farmon va farmoyishlariga, O’zbekiston Respublikasi Vazirlar Mahkamasi qaror va farmoyishlariga, Davlat mulki qo’mitasi Nizomga, hamda O’zbekiston Respublikasi Prezidentining 2006 yil 26 apreldagi 335-sonli “O’zbekiston Respublikasi Davlat mulki qo’mitasi faoliyatini takomillashtirishga doir chora-tadbirlar to’g’risida”gi Qaroriga muvofiq olib boradi.

Davlat mulki qo’mitasi o’z faoliyatini bevosita, shuningdek o’zining hududiy boshqarmalari orqali davlat organlari, fuqarolarning o’zini o’zi boshqarish organlari, nodavlat notijorat tashkilotlar va boshqa tashkilotlar bilan o’zaro hamkorlikda amalga oshiradi.

O’zbekiston Respublikasi Davlat mulki qo’mitasining o’z vakolatlari doirasida qabul qilgan qarorlari vazirliklar, idoralar, ijroiya hokimiyat mahalliy organlari, xo’jalik yurituvchi sub’ektlar, mansabdor shaxslar va fuqarolar tomonidan bajarilishi majburiydir.