2011 yil 28 fevral kuni Davlat mulkini boshqarish davlat qo'mitasida "Xususiylashtirish - davlat mulki bo'lgan ob'ektlardan samarali foydalanishning bosh mezoni" mavzusida matbuot anjumani bo'lib o'tdi.

Unda Davlat mulki qo'mitasi Raisining birinchi o'rinbosari S. Gafarov, Davlat mulki qo'mitasi boshqarma boshliqlari shuningdek, ommaviy axborot vositalari xodimlari ishtirok etdi.

Matbuot anjumanida mamlakatimizda amalga oshirilayotgan keng ko'lamli islohotlar, xususan xususiylashtirish jarayonlarini jadallashtirish, davlat mulki bo'lgan ob'ektlardan yanada samarali foydalanish yo'llari va bu borada amalga oshirilayotgan ishlar, mamlakat iqtisodiyotini rivojlantirishda xususiy mulkchilikning rolini oshirish kabi masalalarga katta e'tibor qaratilayotgani ta'kidlandi.

O'zbekiston Respublikasi Prezidentining 2007 yil 20 iyulda qabul qilingan "2007-2010 yillarda xususiylashtirish jarayonlarini yanada chuqurlashtirish va xorijiy investitsiyalarni faol jalb qilish chora-tadbirlari to'g'risida"gi qarori ijrosi yuzasidan amalga oshirilgan ishlar atroflicha tahlil qilinib, yangi "2011-2013 yillarda davlat mulkini xususiylashtirish Dasturi" loyihasi bo'yicha atroflicha ma'lumot berildi.

Shu bilan birga Hukumatimiz topshirig'iga asosan respublikamizning barcha hududlarida bo'sh turgan, foydalanilmayotgan va qurilishi tugallanmagan davlat mulki ob'ektlarini xatlovdan o'tkazish ishlarining natijalari va bu borada rejalashtirilayotgan chora-tadbirlarga ham to'xtalib o'tildi.

Tadbir davomida O'zbekiston Respublikasi Vazirlar Mahkamasining
2010 yil 8 iyuldagi "Ishlamayotgan, bo'sh turgan va qurilishi tugallanmagan davlat mulki ob'ektlari negizida nooziq-ovqat iste'mol tovarlari ishlab chiqarishni tashkil etish chora-tadbirlari to'g'risida"gi 141-sonli qarori xususida aytib o'tildi.

Mazkur qarorga asosan, joriy yilning 16 fevraldan investitsiya kiritish majburiyati bilan nooziq-ovqat iste'mol tovarlari ishlab chiqarishni tashkil etish uchun aniq investitsiya majburiyatlari ostida bepul beriladigan faoliyat yuritmayotgan, bo'sh turgan va qurilishi tugallanmagan davlat mulki ob'ektlarini "nol" qiymatda sotish bo'yicha boshlangan tanlov savdolari va ayni jarayonlar to'g'risida gapirildi.

Tadbir yakunida jurnalistlar o'zlarini qiziqtirgan barcha savollarga to'laqonli javob olishdi.