Mamlakatimizga tashrif buyurgan Koreyaning Uyushmalarni o'rganish instituti rahbari, "Yangi Osiyo"ni tadqiq qilish instituti Bosh direktori Li Sang Vu  boshchiligidagi 23 nafar institut tinglovchilaridan iborat delegatsiya a'zolari 12 iyul kuni O'zbekiston Respublikasi Davlat mulki qo'mitasida bo'lishdi.

Ayni paytda O'zbekiston dunyoda iqtisodiyoti eng tez rivojlanayotgan davlatlar qatoriga kiradi. Izchil o'sish sur'atlari, yurtimizda barpo etilgan bank-moliya tizimining barqaror va ishonchli faoliyat yuritishi, iqtisodiyotda amalga oshirilayotgan yangilanishlar bugun dunyo jamoatchiligi tomonidan yuqori baholanmoqda. Delegatsiyaning mamlakatimizga tashrifidan ko'zlangan asosiy maqsad, O'zbekiston iqtisodiyotini o'rganish, mamlakatda amalga oshirilayotgan keng ko'lamli ijtimoiy-iqtisodiy islohotlar bilan tanishish va tajriba almashishdan iborat.

  Koreyaning Uyushmalarni o'rganish instituti Koreya Respublikasi uyushma ishlari vazirligi tashkiloti bo'lib 1972 yil tuzilgan. Faoliyati Koreya birlashmalarini o'rganish bo'yicha tizim va yo'nalishlarni aniqlash, maktab o'quvchilari, talaba va davlat tashkilotlari xodimlarini o'qitish va ko'plab sohalarga zarur ma'lumotlarni yetkazib berishga yo'naltirilgan. 2010 yilda tinglovchilar soni 69 ming kishini tashkil etdi.

  Uchrashuvda O'zbekiston tomonidan Davlat mulki qo'mitasi, Iqtisodiyot vazirligi, Tashqi iqtisodiy aloqalar, investitsiyalar va savdo vazirligining mas'ul vakillari ishtirok etishdi.

  O'zaro muloqot chog'ida mehmonlarga O'zbekistondagi ijtimoiy-iqtisodiy islohotlar, xorijiy investitsiyalarni keng jalb qilish hamda davlat mulkini xususiylashtirish sohasida olib borilayotgan ishlar xususida prezentatsiya orqali atroflicha ma'lumot berilib, O'zbekistonning bozor iqtisodiyotiga o'tish davridagi taraqqiyot yo'li haqida batafsil gapirildi. Shuningdek, Mamlakatimiz Prezidenti tomonidan ishlab chiqilgan ijtimoiy yo'naltirilgan bozor iqtisodiyotiga o'tishning "o'zbek modeli" deb ataluvchi beshta asosiy tamoyil asosida olib borilayotgan bosqichma-bosqich islohotlar va uning samaralari xususida to'xtalib o'tildi.

  Hozirda jahon moliviy-iqtisodiy inqiroz salbiy oqibatlarining oldini olishga, iqtisodiyotning yetakchi tarmoqlarini modernizatsiyalash, sanoatni rivojlantirish, investitsiya, mahalliylashtirish kabi qator dasturiy choralar amaliyoti haqida bayon qilindi. Shuningdek, mamlakatimizda amalga oshirilayotgan davlat mulkini xususiylashtirish jarayonining ijobiy natijalari misollar orqali ko'rsatib o'tildi.

  Koreya delegatsiyasi a'zolari tomonidan O'zbekistonning bozor iqtisodiyotiga o'tishdagi bosqichma-bosqich tamoyiliga asoslangan o'ziga xos siyosatiga yuksak baho berildi. Bundan tashqari, mavjud intellektual salohiyat, milliy kadrlarni tayyorlash, yosh mutaxassislarning zamonaviy bilim olishlari uchun yaratilgan ulkan sharoitlarga nisbatan qiziqish bildirildi. Ularning bu boradagi savollariga batafsil javob berildi.

  O'zaro suhbat chog'ida O'zbekiston-Koreya o'rtasidagi aloqalarni yanada kengaytirish istiqbollari xususida fikr almashildi.