Joriy yilning may oyidan boshlab O'zbekiston mustaqil bosma ommaviy axborot vositalari va axborot agentliklarini qo'llab quvvatlash va rivojlantirish jamoat fondi tomonidan Yevropada xavfsizlik va hamkorlik tashkiloti, Jurnalistlarni qayta tayyorlash xalqaro markazi bilan hamkorlikda "O'zbekistonda davlat boshqaruvi organlari va jamoat tashkilotlari axborot xizmatlari faoliyatini takomillashtirish masalalari" mavzusida loyiha amalga oshirilmoqda.

  Mazkur loyiha 2011-2012 yillar mobaynida xorijiy va mahalliy ekspertlar, mamlakatimizning ilmiy-tadqiqot va tahlil markazlari mutaxassislari ishtirokida bosqichma-bosqich amalga oshiriladi.  

  Loyihadan ko'zlangan maqsad - davlat hokimiyati va boshqaruvi organlari, jamoat tashkilotlari axborot xizmatlarining ish faoliyati samaradorligini oshirish, yuqori professional darajaga erishgan matbuot xizmatlari ish uslublarini o'rganish, ommaviy axborot vositalari sohasida qabul qilinayotgan qonunchilikni samarali qo'llash hamda matbuot bilan konstruktiv muloqot o'rnatish orqali takomillashtirishdan iborat.

  Oldin xabar qilinganidek, 2011 yilning may, iyun, iyul oyida mamlakatimizda faoliyat ko'rsatayotgan yirik jamoat tashkilotlari axborot xizmatlari rahbarlari va xodimlari ishtirokida seminar-treningning birinchi bosqichi o'tkazilgan edi. 

  21-23 noyabr kunlari "Poytaxt" biznes-markazining "Uchquduq" konfrens-zalida seminar-treningning ikkinchi bosqichi bo'lib o'tdi.

  Mazkur seminar-trening iqtisodiy yo'nalishda bo'lib, unda Tashqi iqtisodiy aloqalar, investitsiya va savdo, Moliya, Iqtisodiyot vazirliklari, Davlat mulki qo'mitasi, Soliq, Bojxona qo'mitasi, "O'zbekiston havo yo'llari" DAK, shuningdek, "Mikrokreditbank", "Qishloq qurilish bank" va boshqa respublika vazirlik hamda idoralarining axborot xizmatlari rahbarlari va xodimlari ishtirok etdi.

  Shuningdek, seminarga fuqarolik jamiyati institutlari vakillari, chet el mutaxassislari xududiy va mahalliy ommaviy axborot vositalari, shuningdek bosma nashrlarning jurnalist va muxbirlari taklif qilingan.

Tadbirda davlat hokimiyati va boshqaruvi organlari faoliyatining oshkoraligini hamda qabul qilinayotgan qarorlar ijrosini ta'minlashda ularning mas'uliyatini oshirish, davlat hokimiyati organlari faoliyati to'g'risida keng jamoatchilikni xabardor etish kabi masalalar ko'rib chiqildi.

  Seminar-trening davomida fuqarolarning murojaatlari to'g'risidagi qonunchilik holati o'rganildi, axborotlarni olish masalalari bo'yicha ekspertlar tomonidan qilingan ma'ruzalar eshitilib muhokama qilindi, shuningdek matbuot anjumani va davra suhbatlari o'tkazish, jurnalistlar uchun ma'lumotlar(press-relizlar, byulletenlar, sharhlar) tayyorlash hamda ommaviy axborot vositalarida yoritish, ushbu maqsadlarda veb-saytlardan foydalanish va boshqa amaliy mashg'ulotlar o'tkazildi.