Joriy yilning 29 noyabr kuni O'zbekiston Respublikasi Davlat mulki qo'mitasida Birlashgan Millatlar Tashkilotining (BMT) Korrupsiyaga qarshi konvensiyasi targ'ibotiga bag'ishlangan o'quv seminari bo'lib o'tdi. Respublika Bosh prokuraturasi bilan hamkorlikda tashkil etilgan mazkur tadbirda Davlat mulki qo'mitasining markaziy apparat, hududiy boshqarmalari va tuzilmaviy tashkilotlari xodimlari ishtirok etdi.

   Seminarda O'zbekiston Respublikasi Bosh prokuraturasining Iqtisodiy jinoyatchilik va korrupsiyaga qarshi kurashish boshqarmasi xodimi seminar ishtirokchilariga Konvensiyaning asosiy maqsad va mohiyati xususida batafsil gapirib berdi.

Tadbir davomida korrupsiyaga qarshi kurash jarayonida Yevropada xavfsizlik va hamkorlik tashkilotining (YeXHT) o'ziga xos o'rni borligi haqida mazkur tashkilot vakili Ens Rasmusson  ma'ruza qildi. U o'z chiqishida YeXHT tomonidan Birlashgan Millatlar Tashkilotining korrupsiyaga qarshi kurash Konvensiyasida belgilangan vazifalar va ularning ijrosi hamda bu borada dunyo miqyosidagi holat xususida alohida to'xtalib o'tdi.

  Tadbir  yakunida  Davlat mulki qo'mitasi tomonidan korrupsiyaga qarshi kurashni kuchaytirish bo'yicha tegishli chora-tadbirlar rejasi ishlab chiqilganligi va unga muvofiq "burch kodeksi" ishlab chiqilib, amaliyotga joriy etilgani borasida aytildi.

  Ma'lumot uchun. Birlashgan Millatlar Tashkilotining korrupsiyaga qarshi Konvensiyasi Birlashgan Millatlar Tashkiloti Bosh Assambleyasi tomonidan 2003 yil 31 oktyabrda qabul qilingan.